អ្នកភូមិនៅពោធិ៍សាត់ស្វែងរកអន្តរាគមន៍ ដើម្បីនាំកូនស្រីពីម៉ាឡេស៊ី
|
ថ្ងៃទី 2010-07-21 22:30:19 សរសេរដោយ អាន 103 ដង
ស្ត្រីពីររូបដែលម្នាក់ជាម្ដាយមីង និងម្នាក់ទៀតត្រូវជាម្ដាយបង្កើត បានមកដាក់ពាក្យបណ្ដឹងសុំឲ្យអង្គការលីកាដូ ប្រចាំខេត្តពោធិ៍សាត់ ជួយយកកូនគាត់ពីប្រទេសម៉ាឡេស៊ីវិញ បន្ទាប់ពីគាត់បានទទួលព័ត៌មានថា កូនគាត់ត្រូវបានថៅកែវាយធ្វើបាប។
ស្ត្រីឈ្មោះ លី សុខឡោ អាយុ ៤៤ឆ្នាំ ទីលំនៅស្ថិតក្នុងភូមិក្បាលពាម ឃុំស្យា ស្រុកកណ្តៀង ខេត្តពោធិ៍សាត់ ត្រូវជាម្ដាយរបស់ស្ត្រីពលករឈ្មោះ ឆេង សុខរី នៅព្រឹកថ្ងៃទី២០ ខែកក្កដា បានដាក់ពាក្យបណ្ដឹងសុំឲ្យអង្គការលីកាដូ ជួយធ្វើយ៉ាងណាយកកូនគាត់ពីប្រទេសម៉ាឡេស៊ីមកវិញ។
ស្ត្រីឈ្មោះ លី សុខឡោ បញ្ជាក់ពីមូលហេតុដែលគាត់សុំឲ្យអង្គការលីកាដូ ជួយយកកូនគាត់ពីប្រទេសម៉ាឡេស៊ី មកវិញនោះថា កាលពីថ្ងៃទី១៧ ខែវិច្ឆិកា ឆ្នាំ២០០៩ កូនគាត់បានចេញទៅធ្វើការនៅប្រទេសម៉ាឡេស៊ី តាមរយៈសាខាក្រុមហ៊ុនហ្វីលីម័រ ឈ្មោះក្រុមហ៊ុន សាហ្គា ស្សឺវីស។ បន្ទាប់ពីចេញទៅអស់រយៈពេល ៦ខែ ដោយគ្មានដំណឹង។ គាត់ក៏បានទៅជួបខាងក្រុមហ៊ុនសួរដំណឹងពីកូនគាត់ ខាងក្រុមហ៊ុនក៏អនុញ្ញាតឲ្យជួបតាមទូរស័ព្ទ។ ក្នុងការជួបគ្នានេះ កូនគាត់បានយំរៀបរាប់ពីការលំបាករបស់ខ្លួន ដោយថៅកែវាយធ្វើបាប។
គាត់បន្តថា នៅថ្ងៃទី១២ ខែកក្កដា កន្លងទៅ គាត់បានទទួលដំណឹងថា កូនគាត់ត្រូវគេផ្លាស់ឲ្យទៅធ្វើការនៅកន្លែងផ្សេង ហើយរងទុក្ខវេទនាជាងមុនទៅទៀត។ គាត់ក៏បានសុំក្រុមហ៊ុនជួបកូនគាត់តាមទូរស័ព្ទតែគេមិនឲ្យ។ ដោយគាត់ព្រួយបារម្ភពីបញ្ហាសុវត្ថិភាពកូនពេក ទើបគាត់សម្រេចចិត្តដាក់បណ្ដឹងមកអង្គការលីកាដូ ឲ្យជួយ។
អ្នកស្រី លៅ សុខឡោ ឲ្យដឹងថា ៖ «សុំជួបកូនខ្ញុំតាមទូរស័ព្ទ គេថាមិនឲ្យជួប។ខ្ញុំខ្លាចគេធ្វើបាបកូនខ្ញុំ ខ្ញុំមិនទុកចិត្តក៏មកប្ដឹងលីកាដូឲ្យជួយ»។
ក៏ប៉ុន្តែតំណាងក្រុមហ៊ុន សាហ្គា ស្សឺវីស អ្នកស្រី សារិទ្ធ បានបដិសេធការចោទប្រកាន់របស់អ្នកស្រី លី សុខឡោ។ អ្នកស្រីមានប្រសាសន៍ថា ពុំមានបញ្ហាការធ្វើបាបពលករខ្មែរនៅប្រទេសម៉ាឡេស៊ី នោះទេ។ អ្នកស្រីថែមទាំងសន្យាថា នឹងស្រាវជ្រាវបញ្ហានេះដើម្បីដោះស្រាយតាមច្បាប់ការងារ។
អ្នកស្រី សារិទ្ធ មានប្រសាសន៍ដូច្នេះ ៖ «ពូបើសិនរឿងនេះជារឿង ពិត ចាំខ្ញុំដោះស្រាយឲ្យ។ ប៉ុន្តែចំណុចសំខាន់នោះ ភាគច្រើនគឺជួនកាលមកពីម្តាយគេបារម្ភពីកូនគេពេក។ពុំអាចមានរឿង ដូច្នេះទេ»។
យ៉ាងនេះក្តី មន្ត្រីអង្កេតអង្គការលីកាដូ លោក សឺន សែនករុណា មានប្រសាសន៍ថា តាមរយៈពាក្យបណ្ដឹងបង្ហាញថា ទាំងក្រុមហ៊ុន សាហ្គា ស្សឺវីស ក៏ដូចជានិយោជកនៅប្រទេសម៉ាឡេស៊ី បានរំលោភលើច្បាប់ការងារ និងរំលោភសិទ្ធិមនុស្ស។ លោកបន្តថា ការវាយធ្វើបាបពលករ និងការមិនអនុញ្ញាតឲ្យគ្រួសារ ឬឪពុកម្ដាយពលករជួបកូន គឺជាប្រការដែលត្រូវបានហាមប្រាមដោយច្បាប់។
របាយការណ៍របស់អង្គការខារ៉ាម កម្ពុជា បានឲ្យដឹងថា គិតចាប់តាំងពីឆ្នាំ១៩៩៧ មកទល់បច្ចុប្បន្ន មានពលករខ្មែរប្រមាណ ២ម៉ឺននាក់បំពេញការងារនៅប្រទេសម៉ាឡេស៊ី៕
( អត្ថបទនេះដកស្រង់ចេញពី វិទ្យុអាស៊ីសេរី )
|
|
Khmer
M
A
G
A
Z
I
N
E
S
.
C
O
M
|
